(( سعادة البيه )) للمبدع القدير على مصطفى

من طرف **Medhat Mokhtar** الجمعة مارس 10, 2017 1:58 pm

سعادة البيه :-
========
صحيح شاعر
ومالي الحرف بمشاعر
وفكرك فى الهوى عالي
ونزف الفكرة من حبرك
كمان غالى
حروفك فاتحة ع الآخر
وحاضنة الخير
وضمة ف حضنها روعة
ما هيش فى الغير
ودايماً طيرة بترفرف
وبتغني غناوى الطير
تخدنى الفكرة من شعرك
معاها لفوق
وبتعاود على كيفك
برقة وزوق
ولو فكرت مرة اكتب كما حرفك
ألاقى الحرف متكتف
ومش قادر ... يقوووول مخنوق
أقوم افهم وألوم نفسي
ما أنا اللى سمحت لحروفي
تبص لفوق
ومرة أقول طب اطهر
وصفى النية
وقوم أنوى كده وكبر
وحمى الحرف بالمية
ألاقى الكلمة مكسوفة
وبصة بصة مش هيه
أقوم افهم وأقول دا صحيح
دا لازم أزوره مولانا
واخد تصريح
عشان الحرف يتحرر
ويبقى فصيح
وأحقق فى المثل
حاجة قلوها زمان
وأكون كتكوت
ما أنا فى البيضة
بطنطط كمان وبصيح
وكله بفضل مولانا
وتوقيعه على التصريح
فمن فضلك
معالي البيه تصرحلى
وقول لأمين أسرارك
لكل مخازنه يفتحلى
وسيبنى ألف أفكارك
وخليني كمان جارك
ووشوش ودعي ومحارك
وبوح لى بكل أسرارك
عشان أعرف أقول زيك
كلام عشاق
وأنا عن نفسي هرعاها
وأكون مشتاق
ما أنا عارف بأن الحق
زى الحلو فى حروفك
صحيح حراق
ومن فضلك
تخلى الفكرة قدامى
كتاب مفتوح
وقول للحرف يساعدني
بحلو البوح
يا أما تاخدني بستانك
وأخدم فيه
وأما اهديني قاموسك
وقول خلية
عشان خاطري
ما تكسفنيش
سعادة البيه

الإثنين	الثلاثاء	الأربعاء	الخميس	الجمعة	السبت	الأحد
				1	2	3
4	5	6	7	8	9	10
11	12	13	14	15	16	17
18	19	20	21	22	23	24
25	26	27	28	29	30