## سايق عليك النبى## للشاعر الكبير محمد الساعى

سايق عليكي النبي..
.. ماتقربي
انجي بنفسك واهربي
لا هاتلقي فيا قلب كان
ولا هالقى فيكي ..
مطلبي
****
انا كان زمان ..
الحب نهجي ومذهبي
والعشق دايما
هو ارضي وملعبي
وكنت باملك قلب ..
زي الطير تمام
وكنت باتعب
لاجل إنتي ما تتعبي
لكن خلاص
مابقاش في عمري مكان
لحب
مابقتش امْلُك حتى قلب
او حلم يبقالي الشراع
في مركبي
مجاديفي بِيدي كسرتها
وبعترتها ف وسط الطريق
والبحر موجه بيلسع الضَّهر..
اللي عاري
وماكانش بِيدي اختياري
ولا حتى كنت ف يوم
غبي
بس السؤال واعر قوي
عويص وصعب ولوْلَبي
مليون اجابه ماتكفي رد
مابقاش في قلبي مكان لحد
ف بلاش تحاولي تجرَّبي
انا اللي كنت ف طور غرامي
يادوب صبي
وحاولت كل المستحيل
وسهرت اعد نجوم ف ليل
وحاولت اوصل للدليل
وعرفت انه شيئ غبي
وانا مش نبي
فاستحملي البعد المؤكد
قبل ما تتعذبي
وانا مش بشوقي اكون كده
لكنما
هذا الذي جنااااه ابي
ف انجي بنفسك واهربي
لا هاتلقي فيا قلب كان
ولا هالقى فيكي ..
مطلبي
محمد الساعي
2014/7/29