((( خلى كلامك حلو ))) رائعة القديرة ساميه سليمان

من طرف **Medhat Mokhtar** الأربعاء أغسطس 24, 2016 1:41 pm

خلِّي كلامك حلو
---------------
خلِّي كلامك حلو ياصاحبي
كل الناس تصبح حواليك
اللي يبوسك واللي يضمك
واللي يرف جناحه عليك

وف أفراحهم روح هنيهم
وف أحزانهم برضه واسيهم
قلبك يبقي تملِّي عليهم
وف شدتهم مد إديك

سيد الناس اللي بيخدمهم
يسمع ليهم ويطمنهم
لا يضللهم ولا يظلمهم
ويقول للمحتاج لبيك

ليه تتكبر ليه وتتعالي
داحنا عبيد للمولي تعالي
والدنيا ما بتدومش ف حالة
كل عمايلك راجعة إليك

إضحك تضحك لك أيامك
الدنيا ح تضحك قدامك
وان كشَّرت تزيد أوهامك
والحزن ح يسحب رجليك

طاطي للموجة وهيَّه تهدي
من عندك حبة ومن عندي
الموجة ح تفوت وتعدي
ياما أمواج ح تعدي عليك

وف بيتك قول أحلي كلام
ح تعيش أيامك بسلام
لو تتبسِّم للأيام
راح تحلي الأيام ف عنيك

سامية سليمان

الإثنين	الثلاثاء	الأربعاء	الخميس	الجمعة	السبت	الأحد
		1	2	3	4	5
6	7	8	9	10	11	12
13	14	15	16	17	18	19
20	21	22	23	24	25	26
27	28	29	30	31