((( ياصابحه ))) للشاعر القدير المبدع على فرج

من طرف **Medhat Mokhtar** الجمعة مايو 29, 2015 9:11 pm

علي فرج يا صابحة ....
ـــــــــــــــــــــــــــ
يا صابحه تغزلي يومك
على كتف الجدع لاسمر
ونازله تغسلي همومك
في مية نيلك الأسمر
د آسى كتير لطول ليلك
ونام مهموم ومتكدّر
ودمه اللي في شرايينك
مهوش صافي ، ومتعكّر
ولمّا جمال شعاع نورك
لمس خده اللي متعفر
نسي الدمعة اللي في بحورك
وقام يجري ويتشمّر
يسيب الكل ويجيلك
وأمله ع الرضا يقدر
وقال نَفسي فدى عبورك
يا ست الكل يا سكر
هاشدّ العزم وهشيلك
وهاعبر بيكي وهاعمّر
جمال الشط يطاطيلك
ويتبدّل حصاه مرمر
ويعلا صوت مزاميرك
يقوم الأد يتمختر
ومن حُسن وجمال زينك
ضحك مُوجُه ومال اكتر
وحتى خيال قناديلك
رقص ويّاه ولا فكّر
فتح أحضانه يناديلك
وقال للحُسن يتأمّر
صباح تفاح على عيونك
صباح أحلى من السكر
صباح نادي كما جفونك
نسيمه عليل ومتعطر
بيتحنى بجمال طينك
ويرسم وشم متخضّر
وبيقولك انا لونك
أنا لون زرعك الأخضر
أنا قدرك أنا سنينك
أنا مِسكِك أنا العنبر
أنا القمحة لطواحينك
وطعم رغيفك الأسمر
أنا زهرة في بساتينك
أنا رمّانك الأحمر
وهحيا واموت في أحضانك
في ضِل الرمش مش أكتر ..
ــــــــــــــــــــــــــــــــــــــ
بقلم / علي فرج

الإثنين	الثلاثاء	الأربعاء	الخميس	الجمعة	السبت	الأحد
		1	2	3	4	5
6	7	8	9	10	11	12
13	14	15	16	17	18	19
20	21	22	23	24	25	26
27	28	29	30	31